ପୁରୁଷୋତ୍ତମ ଅଟନ୍ତି ଈଶ୍ୱରଙ୍କର ବ୍ୟକ୍ତ ସ୍ବରୂପ I ମନୁଷ୍ୟ ସାଧାରଣତଃ ଈଶ୍ୱରଙ୍କୁ ପାଇବା ଲାଗି ବିଭିନ୍ନ ଉପାସନାର ମାର୍ଗ ଅନୁସରଣ କରେ I କିନ୍ତୁ ଯେଉଁ ଭାବରେ ସେ ତାଙ୍କୁ ମନରେ କଳ୍ପନା କରିଥାଏ, ସେହି ଭାବନେଇ ଶ୍ରଦ୍ଧା, ଭକ୍ତି ଓ ପ୍ରେମ ଦେଇ ନିରନ୍ତର ହୃଦୟରେ ବାନ୍ଧି ରଖି ପାରେ ନାହିଁ I ନିଜର ବୃତ୍ତି ପ୍ରବୃତ୍ତିର ଚାପରେ ସେ ତାଙ୍କଠାରୁ ଦୂରେଇ ଯାଏ I ସର୍ବଶକ୍ତିମାନ ଓ ମଙ୍ଗଳମୟ ଈଶ୍ୱରଙ୍କୁ ସେ ହୃଦୟଙ୍ଗମ କରି ପାରେ ନାହିଁ I ତାଙ୍କର ଅନୁଶାସନ ନମାନି ଦୁଃଖ ଦୁଃର୍ଦ୍ଦଶାରେ ପଡି ହାହୁତାଶରେ ଚିତ୍କାର କରେ I କିଏ ତାକୁ ଧରି ରଖିବ, ମନକୁ ସାନ୍ତ୍ୱନା ଦେବ, ଅନ୍ଧକାରକୁ ଦୂର କରି ଆଲୋକ ଜଳାଇ ଦେବ, ହାତ ଧରି ଭବ ସାଗରକୁ ପାରି କରିବ? ସେହି ଚିତ୍କାରରେ , ଆକୁଳ ଆହ୍ୱାନରେ ସେ ଧରା ଦିଅନ୍ତି  ଓ ନରତନୁରେ ଦୁନିଆରେ ଆର୍ବିଭୂତ ହୁଅନ୍ତି I  ତାଙ୍କ ସୃଷ୍ଟିର ସର୍ବଶ୍ରେଷ୍ଠ କୃତି ମନୁଷ୍ୟର ରକ୍ଷାପାଇଁ ସେ ଆଉ ସ୍ଥିରହୋଇ ରହି ପାରନ୍ତି ନାହିଁ I ନିଜକୁ ସଂପୂର୍ଣ ଭାବରେ - ସର୍ବଶ୍ରେଷ୍ଠ ରୂପରେ ବ୍ୟକ୍ତ କରନ୍ତି ଧରଣୀ ବକ୍ଷରେ  ମାନବରୂପଧାରୀ ପୁରୁଷୋତ୍ତମ ଭାବରେ I

​

 ବୈଷ୍ଣବ ଶାସ୍ତ୍ରରେ ଅଛି - "ଈଶ୍ବରଙ୍କ ଯେତେ ଲୀଳା , ସର୍ବୋତ୍ତମ ନରଲୀଳା, ନରବପୁ ତାଙ୍କର ସ୍ୱରୂପ " I ସେ ହେଉଛନ୍ତି ସେ ମହାଆକର୍ଷଣକାରୀ , ମହାଶକ୍ତିଶାଳୀ ପୁରୁଷ, ଯିଏ କି ମଣିଷକୁ ସବୁ ଦିଗ ଦେଇ ପୂରଣ କରି ପାରିବେ, ସକଳ ଅବସ୍ଥାରୁ ଉଦ୍ଧାର କରି ପାରିବେ, ସେ ହେବେ ଜୀବନର କେନ୍ଦ୍ର I ଯୁଗମାଫିକ ସେ ଆସନ୍ତି, ସାରା ଜଗତ ପାଇଁ I ସେ ଅଟନ୍ତି ସୃଷ୍ଟିର ସର୍ବୋତ୍ତମ ପରିପ୍ରକାଶ, ସତ୍ତା ସମ୍ବର୍ଦ୍ଧନାର ପ୍ରତୀକ , ସତ୍ ପ୍ରେରଣାର ନିରବିଛିନ୍ନ ନିର୍ଝର , ପ୍ରେମର ମୂର୍ତ୍ତ ବିଗ୍ରହ ଓ ଶ୍ରେଷ୍ଠ କଲ୍ୟାଣକାରୀ ପୁରୁଷ I ଏ  ଯୁଗରେ ସେ ଅଟନ୍ତି ଯୁଗ ପୁରୁଷୋତ୍ତମ ଶ୍ରୀ ଶ୍ରୀ ଠାକୁର ଅନୁକୂଳଚନ୍ଦ୍ର I ମନୁଷ୍ୟ ପାଖରେ ଶ୍ରେଷ୍ଠ ଚଳନୀର ଧାରାକୁ ସେ ଧରାଇ ଦିଅନ୍ତି ଓ ସମସ୍ୟାରେ ପଡିଥିବା ମନୁଷ୍ୟ ତାଙ୍କଠାରୁ ପାଏ ସମାଧାନର ସୂତ୍ର I ସେ ଧରାଇଥିବା ପଥ ହେଉଛି ମହାମଙ୍ଗଳର ପଥ  ଓ ମହାବିନାଶ ହାତରୁ ମୁକ୍ତିର ଉପାୟ I ସେ ହିଁ ମଣିଷର ପ୍ରିୟପରମ ଗୁରୁ, ସତ୍ତାର ଧାରକ, ପାଳକ, ପୋଷକ ଓ ସର୍ବଶ୍ରେଷ୍ଠ ଆଶ୍ରୟସ୍ଥଳ I 

​

ଏ ଯୁଗର ପ୍ରୁଷୋତ୍ତମ ଶ୍ରୀ ଶ୍ରୀ ଠାକୁର ଅନୁକୂଳଚନ୍ଦ୍ର ପୂର୍ବ ପୂର୍ବ ଅବତାରଗଣଙ୍କର ନବକଳେବର, ସବୁ ପଥ ଓ ମତର ପରିପୂରଣ ମିଳନବେଦୀ I ତାଙ୍କୁ ସ୍ୱୀକାର କରିବା ଅର୍ଥ ଈଶ୍ୱରଙ୍କୁ ସ୍ୱୀକାର କରିବା, ସତ୍ୟକୁ ସ୍ୱୀକାର କରିବା ଓ ଶୁଭକୁ ସ୍ୱୀକାର କରିବା I ସେ ପରମ ମଙ୍ଗଳକାରୀ ଓ ପରମ ଉପାସ୍ୟ I ଆସନ୍ତୁ ସେହି ପ୍ରିୟପରମ, ପରମଗୁରୁ , ପରମ ପ୍ରେମମୟ ଶ୍ରୀ ଶ୍ରୀ ଠାକୁରଙ୍କୁ ନିଜ ହୃଦୟ ସିଂହାସନରେ ଅଧିଷ୍ଠିତ କରି ମଙ୍ଗଳପଥର ଅଧିକାରୀ ହେବା I ସତ୍ୟାନୁସରଣର ସେହି ଅମୃତମୟ ବାଣୀ ଏଠାରେ ଉଲ୍ଲେଖଯୋଗ୍ୟ -

" ତୁମେ ସଦଗୁରୁ ଗ୍ରହଣ କର, ସତ୍ ନାମ ମନନ କର ଓ ସତସଙ୍ଗର ଆଶ୍ରୟ ଗ୍ରହଣକର,ମୁଁ ନିଶ୍ଚୟ କରି କହୁଛି - ତୁମକୁ ଆଉ ତୁମର ଉନ୍ନୟନ ପାଇଁ ଭାବିବାକୁ ହେବ ନାହିଁ "

​

ତାଙ୍କର ଉତ୍ତରଦାୟାଦ ଯୁଗାଚାର୍ଯ୍ୟ ଶ୍ରୀ ଶ୍ରୀ ବଡଦା , ଆଚାର୍ଯ୍ୟଦେବ ଶ୍ରୀ ଶ୍ରୀ ଦାଦା ଓ ବର୍ତ୍ତମାନର ଆଚାର୍ଯ୍ୟଦେବ ସେହି ଅମୃତଧାରାକୁ ଅବ୍ୟାହତ ରଖି କୋଟି କୋଟି ମଣିଷର ନିର୍ଭୟ ଆଶ୍ରୟସ୍ଥଳୀ ହୋଇଛନ୍ତି I 

ମାତୃଭାଷା ଓଡିଆରେ ଶ୍ରୀ ଶ୍ରୀ ଠାକୁର ଅନୁକୂଳଚନ୍ଦ୍ରଙ୍କର ସେହି ଲୋକକଲ୍ୟାଣକାରୀ ଭାବଧାରା  ପ୍ରସାରକଳ୍ପେ ଏହା ଏକ ଛୋଟ ପ୍ରୟାସ I ଆପଣମାନଙ୍କ ମତାମତ ଓ ସାହାଯ୍ୟ ପ୍ରାର୍ଥନୀୟ I 

​